Brahim AVDYLI

duke lexuar poezinë "Shkruar me lotë",

me ftesën e pjesëmarrjes së KK "Bardhosh Gërvalla", të Ludwigsburg-ut/D

dhe të LSHAKSH-së në Gjermani

 

SHKRUAR ME LOT

 

 

- Tre dishepujve,

  të vrarë në Untergrupenbach,

  me 17 Janar 1982

 

1.

 

Kam shkruar

këtë letër të gjatë

deri në fund të këngës

 

me lotët e derdhur pikë-pikë

 

përpara botës së shurdhtë

edhe njëherë bëhem fëmijë

 

"kush të vrau o Jusuf  Gërvalla" [1]

i marrtë Mortja

me gjirin e shterur

 

Kokrra e Kripës le të pëlcas

fuqishëm midis tokës

 

derisa Bekimi i Nënëmadhes

të bëhet bekim i përjetshëm

 

si pemë e pjekur

e trojeve tona...

 

 

2.

 

Nuk e di

në cilin varg për Ju do të vdes

kur të shpie në vend amanetin tuaj

 

e trojet shqipe

do të ulen këmbëkryq

në një sofër të madhe të pishave tona

 

si gjënë e shenjtë

që nuk harrohet

të qajmë dhimbjen tuaj

 

si është e mundur

të ndahen tokat tona

 

kuçedrat në çdo anë

na kanë rrethuar

 

shqyejnë sa mundin trojet tona

rrënojnë kullat me fëmijë

pluhur i bëjnë sikur të mos jenë

 

gjuha e bukur të mos ekzistojë

nëpër ato pjesë të gëlltitura...

 

Tani Zoti të dëgjojë

ankesën me lot

zëdhënës të tjerët janë bërë

 

pëshpëritin

në çdo varg që e nxjerrin

 

duke ndihmuar

pa pushim

copëtuesit e tokave tona

 

3.

 

E kush ka guxuar

t`u vrasë

 

me gojë të mbyllur

kanë mbetur miqtë

pranë thirrjeve tuja

 

as klithja nuk u dëgjohet...

 

Anash

do ta hedhë këtë fletë

të shkruar në paharrim

 

jeni vet Dielli

që ngrihet ngadalë

gjelat në mëngjes kur këndojnë

 

nga Burimi

do të vijë Drita e juaj

për të pushtuar të gjitha Zemrat

 

mbase

do të shkruhet përgjithmonë

emri i juaj i pavdekshëm

 

në fletën e madhe të Qiellit